Mujhe mere adhikaron se ladne ka adhikar tum
chheen nahi saktey
mere haathon mein hai agar dam
to hoga yudh
nahin janta ki jeetoonga ya nahin
magar ladta to rahoonga phir bhi
kyunki ladna mera prayas hai
apne aap se sahmjhauta nahin karne ka
kahne ko ki main abhi bika nahin hoon
kya hai agar mera bhi daam lag gaya ho
kya hai agar mere nam pe lag gayi ho boli
magar main to bolta rahoonga
apne adhikaron ke liye
apne bhagya ke khilaaf.
Apni likhi rekhaon ke viprit
apne hone ke praman liye
firta hoon badlon mein
kahan kahan
aur main swayam ko dekhta hoon darpan ke koney mein
kaisa aag ke sholay sa jal raha hoon main
kaise main un lapton ke andar
bas saaf bach nikalney key upay dhoondh raha tha.
ek bar fir
main sheeshey mein apni pratichhaya dekh raha hoon
kahi mera aks deekh jaye
aur
lagey ki main jeevit hoon.

Purwai

kamtar hain khushiyan
purnam hai aankhen
yaad jab bhi aati hai
sochta hoon
aisa kyun hota hai
kyun lagta hai ki tum mer kareeb ho
aaj bhi
ab bhi
kal bhi
aur is kal ke baad bhi.
kiska khyal
kiski baaten
mujhe meethe dard deti hai
kyun need mein auchak uth kar takta hoon tarey
kyun peshani par paseeney ki boondein
lagti hai ubharney
kyun .....................
Hamrey simt to hawa ab zard ho chali hai
hamarey hissey mein ayega tumara dard
is khyal se shayad thand aur bhi badh gayi hai
Mujhe malum hai aj rat bahut andhera hoga
kis bazar se kharidun mai roshni
kahan melega mere dard-e-safar ka hisaab?
kis kone mein
chhupi hai subah ki dhoop
kahan hai woh mahatab-e-chaman?
kaise kaise sawal
kaise betukey
kaise anjaney se
aaj kyun uth rahe rahen ye sawalat
kyun man karta hai poochoon gujri baaton ka hisaab
shayad mere pas ki hawa ab purwai ho gayi hai
ghaav sab ubhar rahe hai.

Mere dost, Mubarak ko tumhe!!

Mere dost main aaj khush hoon
kya hua agar dekh nahin paya hun chhapey hue harf tumhare
magar main janta hoon
ki us kitab ki har soch
har lafz
mere jehan se babasta hogi/
main janta hoon ki mere
saath saath chalker hi tumne kahe honge kuch pakey adh pakey khyal
aur wahi phir tabdil ho gaye hongey
badi badi baton mein/
Main janta hoon ki tum kis tarah aadhi raat tak
jag kar socha kiye hogey
main janta hoon ki kis tarah tumharre in unjani pad yatraon par
main ban kar ek khamosh sa humsafar
tumhare saath raha hoonga
aur sun sun kar tumhari bak bak khafa hua hoonga
magar tum kabhi chup hue ho jo ab hoge?
Khuda kare tum yun hi likhtey jao
aur doston ko
nazm likne ka bahana mile.
Amen!

usne poochha tha
mera nam
jan-na chaha tha mere hone ka praman
kya mera nam mere hone se adhik mahavapoorna tha?
kya mera wahan hona ki kafi nahin tha
main tha is liye main hoon
yeh kyun zaroori hai ki mera nam hi meri pehchan ho
kyun mere mathey par likha hota hai
meri nirih manushyata ki kahani
kyun main kuch aur nahin ho sakta
jaise bargad par ugey aam
jaise ghulab mein kal subah ug aye cactus
jaise imli ka swad lage sharbat jaisa
mujhe bhi chalna pahado par lage hai jaise chal raha hoon pani par
waise hi mera nam bhi badalta rahta hai
meri badalti pehchan ke sat sath
ab shyad achcha lagega jab tum poochhogey mera nam
aur meri purnam aankhen dengi jawab
bas samjh lena
ek aur nam rakh liya hai maine
aaj main bahut khush hoon.

kissa bina kahani ke

jab kisi ki yad aati hai to kyon

sar harf ulte seedhe dikhney lagtey hain

kyon lagta hai jaise mere ateet ki tasveeren sab deewaron par tang gayi hain

aur main nanga sa mehsoos karne lagta hoon

kyon hamara mazi hame darane lagta hai

kyon hum bachna chahtey hain

jis se hame itni muhabbat thi

kyon??

Hum kyon dartey hain apne saye se

kyon hamara hi aap hamey darane lagta hai

kya hota hai usme hamey darane ko

kuch jiye hue lamhe

kuch jiye hui mohabbat

bas kuch aur khali se alfaz

Aur kuch bujhey se ehsas

jinme ab jan baqi nahi

bas sukhe hue kagaz par

kali siyahi se likhe kuch harf

tedhe medhe

ulte seedhe

ab unme koi mani nahin baqi

bas ek udas sa kissa

jisme ab koi kahani nahin bachi.

Aaj isi bahane

Aao baith kar is tirchchi dhoop mein
rakh kar ek akhbar muh par
kiye band aankhen apni
kare batein lambi lambi
aur bemani.
Kahin kisi sidhi jaati pag dandi ko dekha hai
jaise tumhare balon mein maang
jaise mere soch si sidhi sapat
bina kisi viram ke
vyakaran ko sirshashan karatey hue
kabhi aap bhi koshish kijiye
kha kar adha pet
jor se hasiye
aur dekhiye ki kaise aansoo nikal aate hain.
Aapke hathon mein basi rekhayen
meri tarah hi hain
apna bhagya to pata nahin
par doosre log padh lete hai majmun
aur bata dete hain bhavishya.
Kya hai kal
kya tha kal
aane waley kal aur gujre hue kal mein kya fark hai
bas sirf waqt ke ehsas ka
aur hamari soch ka
jo kal tha
wahi aaj hai
wahi kal rahega
magar log kahtey hain
ki waqt hi to badalta hai
ham bas apni mrityu ka bojh
puri zindagi dhote rahte hain
jaise koi dhoondhta hai khajane
band andhere jangalon mein.

hum ne chaha tha ki..

hum ne chaha tha ki
mere afsane par koi ghazal likhe koi
kahe koi sher aur log jhoom uthe
main apne aap se poochta raha
sochta raha
ki
kyon mere bare mein koi sochta hai itna
kyon uske kashkol bhare rahte hain
meri yadon ke saye mein
main ek din
ek gumnam ehsas sa
daba hua, sisakta rahta hoon
akhir kyon?
kyon mere as pas koi khushboo si rahti hai
bhini bhini si
baarish mein mogre ki mehak si
tumhare balon ki mahak si.
Phir ek bar
hathon mein le kar hath
dariya ki tej dhar par sapat chalta rahoon
jaise kal rat ko khwab chale aye they
chupke se
mere sirahne se nikal kar...

mere wajood ka sawaal hai...

main aap hi poochta hoon
aur phir aap hi sar hila kar chup ho jata hoon
mere sawaal kai shayad koi jawab hai hi nahin
ya phir koi shaksh yeh batana hi nahi chahta hai
ki kis simt gayi hai meri rooh
kab se
kis zamane se main khojta raha hoon
kaisi thi meri rooh dekhne mein
kya meri shakl milti hai us sey?
Inhi galiyon mein bhatakti hogi
bade sharon mein to uska ji lagta nahin hoga
kahan se milenge woh darakhton ke thandey saye
ki faila kar chadar ek tooti khat par so rahe bhari duphari mein?
kahan milega sukoon use kachchi sadkon aur tang galiyon mein daurne ka
woh bhi kisi gaadi ke neeche aaney ke dar ke bagair.
mera wajood
mera maji se nikal kar
meri hasti ka saman ban kar
mere thahakon me goonjta tha
phir jaise use nazar lag gayi
bade shahron ki
kya jane.....

Han yeh sach hai !

Han yeh sach hai
aur sach ke siva kuch bhi nahin hai
aur ho bhi kya sakta hai
mere bare mein jo tum sochte ho woh sab sach hai
sab ka sab
har kuch
mere wajood ke kuch tukre tum bhi le jao
shayad tumhe bhi aa jaye kuch samajh
aur aa jaye thodi si pehchan
mere jaise insaonon ki
kya pata
tum bhi badal jao phir
yun hi baithe rah kar
muskuratey raho aur
main sochta rahoonga ki
mere maji ke yeh tukre
meri soch ka daman pakad kar
yun saanjh ke dhudhanlkey mein
aansoo ki pagdandi par chal kar kaise mere aaj mein aa gaye ho.
aur ab aa hi gaye ho to baitho mere paas aur main ponch doon tumhari sari udasiyan
jaise kal ponchi thi slate per likhe kuch tedhe medhe harf.

maine kaha tha....

तुम्हे याद हो या न याद हो
मैंने कहा था
फिर आयेगी यह काली अँधेरी रात
सनसनाती हवा लिए
और हमें डराने
हम डर भी जायेंगे
हमारी फितरत ही है कि हम डर ही जाते हैं
हमारी आदत सी बन गई है फिर
अब चाहे भूत हो या हो केवल छलावा
हम डरते ही रहे हैं
कभी धुप से तो कभी छाँव से
तो कभी बढती हुई परछाइयों से
हम डरें हैं अपने ख्यालों` से
सिहर कर फिर छुप गए थे
अपनी लम्बी मोटी चादर के नीचे
लगा कुछ देर डर भाग गया था
और हम चाँद कि तरह मुस्कुरा कर निकल आए थे
बादलों के बीच से
तभी चुप से
आ कर दबोच लिया था तुम्हारे ख्यालों ने
मैं क्या करता ?